Senda da Levada de Casqueiros (Pazos de Borbén)

Consonte citan os carteis que atopamos ao longo deste roteiro que promove a Comunidade de Montes de Borbén: "O Sendeiro da Levada de Casqueiros acompaña á auga no seu percorrer, dende a Carballeira da Reitoral, onde se atopa a Fonte das Dúas Caras, ata a parte baixa da Chan de Xunqueiras, a través de fermosas paraxes e fragas nas que abundan carballos, castiñeiros, bidueiros, ameneiros e salgueiros. Sempre ao carón da auga, pasaremos por fontes, lugares de repouso como o Burato do Inferno ao paso polo regato Porta Fraga, seguindo o curso do río Pozo Negro. Ao abrigo da vexetación de ribeira que medra xunto a el, atoparemos tamén signos da estreita relación que dende anos mantén o home e a auga, como a propia Levada, os muíños de Xaniña e Cubelos ou a Tola." Conta con boa sinalización. Se non estades cansos e queredes seguir andando, (a maiores da senda da levada) podedes continuar ata Casqueiros polo antigo sendeiro do Santo Aparecido por fermosas fragas. Para facelo, logo de chegar a presa, subides e no cruce do camiño colledes a dereita, seguindo as marcas amarelas e brancas. O percorrido duplicarase sobre o proposto inicialmente.